Proatje bie n ploatje
Olle pastorie aan Hoofdstroat Winzem, n knoeperd van n gebaauw oet 1914, gaait plat. Is al zowat plat. Hai ston Kerk, dij net n nuvere sent om kont had het, gewoon ien weeg. En al leek t van boeten of n haile scheet, aan binnenkaant was t nait veul soeps meer. Vot der mit. Plat!
En zo n sleuperij geft vanzulf de neudege bekieks. Ale doagen staait r wel n kobbeltje volk te kieken, hou of de sleupers mit t prachtege spul van Gjaltemoa de ‘kunst van het slopen’ oetvoeren. Mor ook om de grode levensvroagen te bespreken: Wat kost dat wel nait? Zollen ze dat stuk mit haand of mit de grode grieper doun? Hou komt dij muur van Bolhoes veur dag?
Ook elk dij der bie laans fietst of wandelt het r wel n mainen over: ‘wat schaande ja van zo n mooi gebaauw’ mor ook: ‘wat komt Kerk nou toch mooi oet de vaarf’.
Ik denk dat boudel der flink van opknapt. Kerk -woar heur je dat nog- gaait r op veuroet. Dat grode Vrijwillegersplaain, mit hier en doar n bankje en n boomke, geft straks ale roemte t doagleks nijs ien Winzem te bespreken. Kopkovviemitkoukterbie vanoet kerk, dat ken hail gezelleg worden.
En dat mout we mit Boogplaain nog mor ofwachten.
I-pit
