Column: Kiek-over-diek (23)

Foto: WinsumNieuws

Richten Togelaand

Pril dut wat e wil en dat hewwe waiten: n koppeltje schiere en of en tou haile schiere doagen mor ook haarstachtege ekzemploaren mit nuver wat wotter en n dikke wiend. Je mouten ter mit doun. Nou ist maai en wordt t tied veur wat stabiel veurjoars- en zummerweer. Zodat je ook mit goud fesoun ien tent of kerreven op kemping ien Winzem of op Lauwersoog touhollen kennen.

Mor verwacht r ook weer nait teveul van, den kent ook nait tegenvalen. Teleurstellens bestoan nait, heb ik wel ais lezen, allenneg te hoog gespannen verwachtens. En dat geldt nait allain veur t weer mor bevobbeld ook veur voeballen. Ons FC Grunnen rekende der van te veuren haildaal op dat ze Europa iengoan zollen, nou dat hewwe zain: ze magen blied wezen dat ze aankom joar nog weer op hoogste plan mitdoun magen.

Denk nou nait dat ik ien n geweldeg sombere bui ben, ik zeg allain dat je van zoaken as t weer en voeballen op veurhand nait teveul verwachten mouten, den ken t nooit tegenvalen. Somber wor ik wel ast over politiek gaait: ze beloovm joe dat ale schoade van de grondschokken ien Grunnen vergoud wordt en den willen ze nou, ast op de verstaarkensoperoatsie aankomt, de kond r veur wegdraaien. Dat bennen gain tegenvalers, dat is joe verneuken willen woar je biestoan!

Gelukkeg zit r van t joar nog wat moois ien t vat: wie goan nou serieus per ain jannewoarie noar ain grode nije gemainte Het Hogeland. ‘Het’ haar veur mie wel ‘t’ wezen kend, gemainte Togelaand dus. En nog wat: ik haar kozen veur t Berlage-gebaauw ien Oskerd as nije gemaintehoes. n Prachtgebaauw, n publiekstrekker en mooi centroal. Dat was n topper west!
Mor goud, nait meer zoesen, ale koegels bennen deur kerk, nou wordt t personeel deurnkanner huzzeld en der worden allerhande bieainkomsten organiseerd om de ienwoners, joe almoal en ik dus, wennen te loaten aan t idee. Goie zoak, ken ook zeker gain kwoad, mor echt neudeg ook weer nait.
k Wil nait loven dat veul ienwoners ain seconde wakker legen hemmen van de fusie. En den ken t ook hoast nait meer tegenvalen.

Ain jannewoarie dus ist zowied. Ik zai t hailemoal zitten: ‘Kiek over diek’ krigt r mooi stuk diek bie. En let op mien woorden: dij Waddenbraide kiek over diek wordt en blift pronkjewail nummer ain van nije gemainte Togelaand!

Moi
I-pit

Cookieinstellingen