Luilakken bie de Lago
Nait teveul bewegen, laifst haildaal nait, op tied even kopk’onner, kolle does ken ook, en veuraal der ook om denken dat je genog vocht binnenkriegen. Zo zelt bie joe wezen en zo ist hier zeker: Noord-Itoalie aan de Lago Maggiore. Doar stonwe n dag of vattien mit ons tentje, vlak bie t wotter en mit oetzicht op baargen. Itoalioanen kloagen derzulf ook over, zo stikkehait ast hier is, overdag en s naachts ook.
Eerste week hawwe gain WiFi, das wel even wennen as je thoes versloafd bennen aan I-phone en I-pad. Mor nou benwe wel weer ‘aanlien’ en dus ook even koekeloeren op Winsum.nijs. Interview mit Wilm van Golden Kaarper, dij dörpsplaain n zetje ien goie richten geven wil mit wat oetpoestbanken en -stoulen. “Beter wat as niks”, zel Wilm docht hemmen en geliek het e wat mie aangaait. Frutzelplannen aan Obergommer Kerk gonnen nait deur, zo lees ik ook, gemainte het keudel ientrokken. Sjaak Tersteeg blied vanzulf en ik mit hom. Dat soort plannen zet gain zoden aan diek.
Guster even Arona aandoan, n mooi histories stadje mit zo’n dikke vattiendoezend ienwoners aan zuudwestkaant van de Lago. Wie waren der vanweek al eerder west, op n mirreg, dou waster om te smoren en niks te doun. Mor guster loater op oavend, wie wollen r n hap eten, was t de wereld op zien kop: file noar t stadje tou, ale parkeerploatsen stenvol en, wie wollen t nait loven, n smak volk bie pad van je helahola. Wat was der te doun: ain lange boelevaar mit aan ain kaant de Lago op zie mooist mit schitternd oetzicht op overkaant, en aan aander kaant winkels, restorantjes, bars, ies- en aander vreettenten, overal bankjes, hier en doar n fontein en alles goud en gezelleg ien t licht. En op boulevaar dus een gigastroom aan volk, old en jong deurnkanner, eten, drinken, swingen, op n bankje zitten oetpoesten of gewoon kuiern, flaneren zeg mor. Het dee mie denken aan n drokke Hemelvoartsmaart ien Ainrom en den nog drokker.
Ik docht vot aan Winzem, toch ook n histories stadje aan t wotter, mor zunder fersounleke boelevaar. Vot nait te groot denken, eerst Boogplaain mit kemping verbienden bevobbeld deur zo’n soort boelevaar. Begriep mie goud, het gaait mie der nait om Arona te imiteern. Eerst van Boog noar veurbie nije brug, dat wordt al wat. Ik zai al volle terrazzen mit eettentjes en meziek op Boogplaain, tegenover Derk en Kunnie Wierengoa ale roemte veur ‘Winzemerdaipkonsert Vannijs’, sport, spel, meziek en daanzen bie de kemping en: Obergumer Kerk dij ien t volle licht staait te glimmen.
Ik geef tou, t idee is weergevuileg en wel wait denk ik r van t haarst, ast regent, störmt en hoagelt, wel weer aans over. Mor meschain ist toch wat as n delegoatsie van gemaintebestuur mit wat ondernemers en Winsum.nijs ais n raaiske noar Arona moakt. Om te kieken hou ze t doar aanpakken. Ik ken joe t aanroaden.
I-pit
