Column: Kiek-over-diek (28)

Foto: Archief HN

Oepke Overdieps

t Wil meschain wel nait hail goud zummern, mor om te fietsen magen we leste tied nait kloagen: mainst dreug en voak s mirregs zun derbie. En hier mout je nait zoesen over wiend, want dij krigs hoast aaltied kedo en nait allenneg ien rug.

Vrijdag was t ook zo’n schiere dag. ‘Visvliet’: doar mos raais volgens fietsmoat Johan en ik mor noar tou, Westerketaaier haren wie leste moanden nog nait al te veul van zain, dat wer hoogste tied. Eerst mor op Olhoof aan, via Schouwerziel en Soaksem.

Deursnee fietsen wie twijmoal ien week en den zo’n vatteg, viefteg kilometer per keer. En wie goan onderwegens nooit aan, wie kennen thoes wel weer wat bietenken. Mor volgens Johan zaten we vrijdag al over de doezend kilometer op de fietsteller. Zo’n gegeven zakt joe votdoalek ien de bainen en wie besloten akuut n feestelek tintje aan ons raais te geven. Stuur richten Nijhoof en t onvolprezen Eisseshof!

Noa n uuttje terras richten Kommerziel, mit n poar verteerns ien de bainen dus.

Ien Kommerziel heb ik nog wat geschiedenis liggen. Doar ging ik as kwajong mit pa en moeke op zundag op verziede, bie Oom Renze en tan Gittje (n zuster van mien opoe). En Oom Renze, dat wait ik nog, dij prout n wat vremde toal.

Gain ‘oet, thoes en schiethoes’ mor: ‘uut, thuus en schiethuus’. Dat was dus ‘overdieps’, zeg mor toal van aanderkaant t Raidaip.

Dik zesteg loater fiets ik weer Kommerziel ien, kieken wat r nog van over is. Dörp ien, om kerk tou, eerste de beste stroat ien en: doar zit de eerste de beste Kommerzielster op n bankje veur t hoes van zun te genieten. En ien ainmoal roak: dat hoes -zee e- was t ol hoes van Oom Renze en tan Gittje!

Oom Renze en tan Gittje bennen der al laank nait meer, mor t hoes staait r nog fris en fruiteg bie.

En Kommerziel het nog meer: aan rand van dörp staait n pertij nijbaauw van de duurste soort, t liekt wel de Goldkust van Kommerziel!

En doarvandoan rie je zo n geweldeg netuurpaark ien mit wotter, moeras, bosjes enzowathin (kedootje van de NAM, dat waren nog es tieden). n Wereldpaark om te wandelen en deurhen te fietsen!

n Mooi oepke overdieps dus, noar Kommerziel, wanneer kom je doar nou? En Visvliet? Gain idee, doar benwe nait aan toukommen.

 

I-pit

Reacties

article
138801
Oepke Overdieps t Wil meschain wel nait hail goud zummern, mor om te fietsen magen
https://winsum.nieuws.nl/column/20190526/column-kiek-over-diek-27-2/
2019-05-26T19:16:56+01:00
https://cdn.nieuws.nl/media/sites/382/2019/04/01231311/Kiek-over-diek.jpg
Column, Nieuws