Column: Kiek-over-diek (1)

Foto: WinsumNieuws

Vandaag verschijnt de eerste bijdrage van onze Groningse columnist I-Pit. Maandelijks zal hij voor u over-diek-kieken in prachtig Gronings dialect.

t Allerbeste nog veur t nije joar, ik ben der wat loat mit, mor beder loat as nooit, nait den? Opperman van winzem.nijs.nl het mie t zulf vroagd: elke moand n stukje, ien t boers, liekt die dat wat? Joazeker liekt mie dat wat!

Winzem.nijs.nl , doar goan we nog veul plezaaier aan beleven. De jonges dij doar aan trekken kenje volgens mie wel om n bosschop sturen, dij waiten woar ze t over hemmen en waiten wat ze willen. De tied van Mekeltje, Geel Kraaintje en Winzemer Wiekslag ligt achter ons, de wereld is digitoal worren en nijs via kraant deur gleuf van veurdeur: das verleden tied, over, oet!

Winzem.nijs.nl dus, doar zit toukomst ien, doar kenwe Winzem mit op koart zetten. En dat is neudeg ook, want as je zo om joe tou kieken ist hier en doar mit permizzie n zootje. Neem nou de heriendailen, ze willen hier ien Noord-Grunnen zo te zain noar Ain Grode Gemainte, G7, van Lauwerszee tot Dollard aan tou. t Liekt mie net niks, mor ast echt nait aans zit, tou den mor.

Zes van de zeuven gemainten zoezen mor wat hinneweer, roupen en reren en gunnen kander t licht ien ogen nait en Winzem……………. holt zich op de vlakte.

Hail verstandeg, want Winzem is volgens mie nou nog ainegste gemainte dij recht van spreken het. Verstand mout veurop, zeggen ze aaltied en dus mout Winzem as superverstandegste gemainte de spin ien t web worren: van ‘Winzem en Obergom’ noar ‘Winzem en Omstreken’, de nije grode gemainte aan t Wad! Mit 100.000 ienwoners en oetkiek over diek!

En wie mouten mitnkanner kop der goud bie hollen, want guster stont mit n dikke vedde kop ien t Dagblad: ‘Groningen is uitgeleefd’. Tou mor, das ongeveer t zulfde as: Grunnen is dood, of lowwe zeggen: op staarven noa dood. As t zo deurgaait mit krimp en grondschokken, zegt Dagblad, den ist n bekeken zoak hier.

Let op mien woorden: het gaait r op aan! Der vaalt straks n besluut over G7 en provincie ligt op zien kond. Ideoale omstandigheden om Winzem veur aaltied op de koart te zetten. Ik heb t al goud veur de bril: ain grode Waddengemainte ‘Winzem en Omstreken’ dus, Suzan Wierengoa en Dimitri Sennemoa ien t nije gemaintebestuur en Cees van der Meent hoofd kommunikoatsie.

Winzem en Omstreken.nijs.nl

Dat ken hom helpen, nait?

Nog veul zegen!

I-Pit

Reacties