Vandaag de vijfde bijdrage van onze Groningse columnist I-Pit. Maandelijks zal hij voor u over-diek-kieken in prachtig Gronings dialect.
Promootzie Winzem
Wel der op rekend haar: ikke nait! Winzem, zo op t oog n prachteg dörp en ien loop van joaren oetgruid tot n prachtege gemainte op t Hogelaand. En toch: t ston noeit echt op de koart. t Haar de noam van n beetje bekrompen, ook wat verbeeldens en t ston zeker nait te bouk as doadkrachteg.
Vrouger (60 joar leden) was der laank gedonder over ‘zwembad open op zundag of nait’, elk geloof haar zien aigen voebaalklup en meziekverainen en ook verplichte winkelneern. En was t woord promootzie nog nait oetvonnen.
Tuurlek is der van alles ondernomen om Winzem op koart te kriegen: joaren is r aan waarkt om Winzem tot ‘kanodörp bie oetstek’ te promoveern. En n joar of wat leden is Stichten Promootzie Winzem ien t leven roupen, dij onner aanvoeren van n poar jonge top-onnernemers scholders der onner zet het. Van alles en nog wat wordt r organiseerd, der is nou n joarkalender van heb-ik-die-doar. Wat je ook zeggen kennen van Winzem, mor der is op t heden veur elk wat wils.
Mor sums mout je, om echt wat veurnkanner te kriegen, stomweg gewoon geluk hemmen. Den komt t joe gewoonweg aanwaaien. En dizze raais komt Winzem t geluk aanwaaien vanoet de lokoale politiek! Wel haar dat docht? Hou is t ien de vrede meugelk! Wat is der aan de haand?
Gemaintebelangen, grootste partij ien Winzem en mit vaaier zetels de grootste ien de road, het al n zetje rebulie ien aigen tent. Ien kort bestek op n riegje: wetholler Gemaintebelangen stapt op,
zien opvolger komt oet de fractie (nog 3 over), dij hom opvolgen mout ien de fractie ligt nait lekker bie aander fractieleden, den stapt fractieveurzitter op (nog 2 over, doames), den stapt eerst aine doame op (nog 1 over) en den aander (0). Haile fractie opstapt, allenneg nijkommer dij nait lekker lag, zit op zien nije stek. t Verhoal van de 10 negertjes nuimden wie dat vrouger. Wat het dat mit promootzie Winzem te moaken, heur ik joe zeggen?
In dit geval alles, want t mooiste van t verhoal is dat de haile interne mikmak al vrougtiedeg op stroat lag. Winsum.nijs, Ommelander Kraant mor ook RTV Noord kregen vinger achter het gerommel bie Gemaintebelangen en kregen r ook zuver oareghaid aan: doames dij t nijbakken fractielid gain haand geven wollen, n open braif van old-wetholler, elke börger van Winzem en omstreken kon t verhoal braidoet via kraant en radio volgen. En zien vingers der bie ofslikken. As joe mie vroagen te mooi om woar te wezen.
En n geschenk oet de hemel ast om promootzie Winzem gaait. Dit is n drama ien de woare zin van t woord en dus tougelieks n spektoakelstuk van eerste orde!
Organisoatsie van joarlekse Nijjoarsveziede dut al joaren mit groot sukses zien best om wat schiers te braauwen oet t nijs ien Winzem over t oljoar. Veur t eerst ien de geschiedenis komt t heur gewoon nou aanwaaien. Aaltied mozzen ze ‘van niks wat’ moaken, nou wordt t heur op n prezenteerbloadje aanboden. Wat wil Winzem nog meer?
Nijjoarsveziede het eerste rechten, ik reken der op dat de Hoogte al veur zummer tig keer oetverkocht is. Dat is den n mooie opstap noar n joarleks gebeuren op Boogplaain (ligter kloar veur), als vervolg op de machteg-mooie Ripperda-oetvoeren en te vergelieken mit wat ze al joaren mit Shakespeare ien Diever doun.
Ien de politiek –heur ik voak- is ain van de grootste problemen dat t ver van t publiek ofstaait. En inderdoad: t volk het n hekel aan t geneuzel en t gekonkel wat doageleks via kraant en radio en televisie op heur ofkomt. Mor “pobbekaast” en “soap”, doar benwe van oldsher gek op. Almoal.
Zörgen dus dat joe op tied koarten kriegen!
I-Pit
