Old en nij
Traditiegetraauw wor je ien dizze tied doodgooid mit old nijs.
Logies, twijdoezendzestien lopt op t end en den moakt elk en ain
-want boukhollers bennen we en blieven we- ‘de balans’ op.
De haile film wordt nog ais weer ofdraaid: Trump, Wilders,
Denk, Johan Cruijff, aansloagen mit of zunder vrachtwoagen, enfin,
vul zulf mor verder ien, t staait ons nog vris veur de bril.
Old nijs dus, op Oljoarsdag de fik-ter-ien, den is der weer roemte
veur nij nijs.
Nij nijs, dat is t mooie, begunt mit niks. Links of rechts n opmaarken
van n roadslid, n domme oetsproak van ain of aander bobo, n bedrief
dij zien ofval dumpt, t ken van alles wezen. Mainstied waiten wie
achternoa nait ens meer hou t begonnen is. Dat gedonder mit dij
kunstgrasvelden woar kankerverwekkende korrels op liggen zollen:
hou begon dat ook al weer?
Milnsom, n prachtege plek aan diskaant Eemshoavenweg, heurt bie
gemainte Loppersom, mor wil bie nije gemainte Hoogelaand.
96% (wel nait?) van ienwoners is r veur. n Roadslid ien Beem begon der
over en zee dat t ien Middag-Humsterland ook kon: zulf bepoalen
woar je bie heuren willen. Hoast-old-börgmeester Henk Bakker kon nog
net even zien aai kwiet:
- Ik bemui mie doar nait mit, t is n zoak van gemainte Loppersom;
- Vergliek mit Middag-Humsterland gaait nait op, ze prouten der doar al joaren over;
- Ien Milnsom is n groep ienwoners dij aans wil. Mor zo waarkt t nait.
Ik ken Milnsom (mien moeke komter vandoan en is mit n Hoogelaandster traauwd),
doar loaten ze heur kees nait van stoet eten. Joe kennen der op wachten:
- Bakker is old nijs en oetb(k)akt, woar bemuit r hom mit?
- Milnsom moakt zulf wel oet ‘of het zo waarkt of nait’.
Wat ik joe brom: dat wordt nog nij nijs veur 2017.
Mooie doagen en alvast veul zegen!
I-pit