Zummertied
In de nacht van komende zaterdag op zondag doet de zomertijd zijn intrede.
Ik lees dizze regel ien Ommelander Kraant, mor t liekt woarachteg wel n zin oet n stuk van Twijde Koamer, of oet notuuln van gemainteroad. Ambteleke toal: ‘doet zijn intrede’. Of Sunnerkloas weer vout aan waal zet!
Het mout wel offiesjeel aankondegd worren vanzulf, want elk mout t waiten. As joe t toevalleg nait mitkriegen, ligt joen haile bioritme aan barrels en doar kenje n nuver zetje last van hollen. Goud dus dat elk der even wait van krigt. Feilek is t ook n mooie feesteleke gebeurtenis: t is zummertied en t is meschain even wennen, mor veur dat uuttje kriegen we meer licht.
t Ken ook gain touvaal wezen dat zummertied soamenvaalt mit n aander feesteleke gebeurtenis: meertmoand streektoalmoand! Woar t mor ken, ook bie offiesjele vergoaderns, wordt r dizze moand platproat. En wordt t volk vroagd noar t schierste Grunneger woord. Dizze raais hemmen ze drij toppers selekteerd, woar de schierste oetkommen mout. Dit bennen ze: ‘knitter’, ‘sjomp’ en ‘gebelschop’.
Smoaken verschillen, mor dij drij woorden: ik vien der niks schiers en feesteleks aan. ‘Kounavvel’ of ‘mieghommel’ haar mie beder touleken. En t Grunnegers ken zo mooi wezen: niks gain ‘Zomertijd doet zijn intrede’ mor: ‘Klok gaait n uur veuroet! Lowwe mor n klokje op zummertied nemen!
I-pit
