Sunnerkloas
Kiek over diek en: doar komt e weer, aankom zotterdag. Sunnerkloas. Stoaregaan wordt spanning veur t lutje goud weer opvoerd.
Sunnerkloassjoernaal haar hom guster nog nait ien t vizier en zigt allenneg nog mor störm, regen en hoge golvm, mor wie konnen al wel zain dat kedookes al van boot of dondern. ‘Doar goan mien kedookes”, brulde mien klainzeun van vief!
Mor zotterdag, zeden ze van t sjoernaal, komde aan ien Dokkum, zeker waiten.
Bie touvaal von ik n ol knipsel van Ommelaander Kraant van november ’91 mit t program van aankomsten van dou hier ien de buurt:
Sinterklaas in Middelstum: per stoomboot arriveert hij vanuit de richting Toornwerd, aankomst ongeveer 13.30 uur bij café Grommers;
Sint naar Eenrum, aankomst 14.00 uur in de haven;
Sint doet Kloosterburen aan: 14.30 uur in de haven van Molenrij;
Sinterklaas ook naar Loppersum: 13.30 uur op de kruising Singelweg – Wirdumerweg;
Sinterklaas zal ook Onderdendam aandoen: de Goedheiligman zal om 14.00 uur de jachthaven binnenvaren.
Doudestieds veur d’olle grieskop al gain kaddepis, zo’n vol program. t Gaait den wel om seizoenwaark, mor toch: goa der mor aanstoan!
En zo’n dikke viefmtwinneg joar loater is r wat dat aangaait nait veul verannerd. Ien nijste Wiekslag lees ik dat ol boas zotterdag aankomt ien Winzem en ook ien Saauwerd, Oadörp, Bavvelt en Gawwerd. Woar aal nait?
Gelukkeg mor, want wat is r mooier as n leventege (live) aankomst van Sunnerkloas woar n smak volk op ofkomt. En lutje beudels mit aigen ogen zain kennen wel ien dizze duustere tieden veur lichtgevende kedookes zörgt. Eerst zain en den geloven, nait den?
Veur t zulfde geld gaait t ien dizze tied van internet en sosioale media mit Sunnerkloas totoal verkeerde kaant op: olluu en kiender dounlooden de Sunnerkloas-ep en regeln haile boudel mit ain klik vanoet luie stoul. En komt Sunnerkloas veur Jan mit de korde achternoam mit boot aan.
Lowwe hopen dat t nooit zover komt!
I-pit
