Veurjoar
k Rie mit vraauw en sleurhut vanof ons hoes ien gemainte Eemsmond, via gemainte Winzem noar Lauwersoog dat ien gemainte de Marne ligt
Dat scheelt dommee n best end rieden , as de heriendailing n fait is, din huif ik mor deur ain gemainte meer hén.
Lekker makkelk , n beetje dom docht, mor och makkelk denken is zo stoer nog nait.
t Boogplain aanklaiden waas n probleem, mor mit n nust winzemervlaggen en n vrachtwoagen Koaps Vioultjes ien n struup, staait hail Winzem der dommee weer fleurig op.
Bertho Merckx nog even verklaiden as Maja Wildevuur en wereld zigt der hail aans oet.
Ien Roodschoul haren ze n muzikoale trainraais organisaaierd.
Ze wollen aainhaaid wat hechter moaken , ingrediénten waren der wel , mor t bakte nait.
Bin der baang veur of t wel lukt is, beswoarden, koksen en openboaren kinnnen as ze deur n kaander hén mongen worden wel n mooi proekseltje worden docht ik zo.
Mor nee, ze waren weer ofgeschaaiden, weer op de verschillende stetions ien t dórp.
Aigenwies soamen zingen mit brassband Immanuel, Volksonderwieskoor zingt mit de Bierspiekers, de Scholtensfamily mit t kerkórgel en din krieg je echt n aainhaaid.
n Bosje Koaps Vioultjes der bie en kloar is Kees.
Hang noar nostalgie is ook groot.
Trekpeerden ien Garnwerd, gain Belgen mor n Hongoar en n aander maark deden t waark
Manske Blok zee dat t duurzoam en effectief waas.
Dus kinnen we straks verwachten dat bórgmeesters mit haanden aan t eerapppelreuden goan, terug noar tied dou t nog kraaben en knoeien waas
Duurzoam en effectief , wethollers mouter der din achteraan om vergeten eerappels noa te zuiken.
Noatied ien t omgewould laand n lap Koaps Vioultjes zaaien en din is ook dat weer duurzoam en effectief.
Mor t veurjoar komt der aan mensen, t wordt weer roem ien t gemoud.
Pak fiets onder kont en kiek noar lammerkes ien t laand of noar eerappelreudende ambtenoaren , Manske Blok din mit n Bels peerd ien taauw.
Dou woar je zin aan hebben, aarger joe nait aan dingen, wat moakt t oet dat fam v Bolhoes van kerk of is ?
En dat vraauwlu van Winzem 1 n periodetitel vieren , wees blied wat is der mooier as vraauwlu dij n periode vieren?
Zuik nait overal wat achter der is aal ellén genoeg ien wereld.
Wie binnen nou vlak bie Lauwersoog, ik kiek over t laand en genotter der over.
Ik denk aan de consternoatie dat t gaaf van dat aanplakbiljet mit twij kerels der op, dij kaander der ain veur bakken .
Veur mie voart n geel bestelautootje aal vanof Winzem veur ons , mit n pertret der achterop dij ons aal de haile raais aankikt, hai loert mor en loert mor, hai hait Bob zegt e.
k Wait nait wat k laiver zai , mor geloof dat k mor ……n bos Koaps Vioultjes koop.
Stronk
