Dórpsvisie Zandeweer, Eppenhoezen, Doodstil
Vrijdagoavend wuir t eerste exemploar van t boukje over dórpsvisie van dizze dórpen oetriekt aan Marijke van Beek.
Dit gebeuren haar ploats ien dórpshoes ” t Klokhoes” Zandeweer.
Mien toak waas om Jan Veldman n poar vroagen te stellen, dus op tied der op óf.
Eerste dij ik letterlijk en feguurlek tegen t lief laip waas Ard Torrengoa van Winzum nijs.
Ik vroug hom hou gait t mit Cees, dat wis e nait,k zai hom nait zo voak zee hai.
t Begon aal mooi vol te lopen en ik laip noar Jan om t boudeltje even deur te nemen.
Jan ston mit vraauw achter t toneel en onnerling haren wie besloten dat t gain stief boudeltje worden mos.
Midden ien t gesprek komt der n man aanlopen en vraagt mie: Most ook optreden ?
Veur dat ik wat zeggen kon sprak e Jan aan en zee: Jackob Jansen van de historische verainen oet Oskert.
Jan keek hom gloazeg aan zoas allain Jan kieken kin en zee t historisch woord Oh.
Doe most bie ons optreden en mit dat e dat zee keek Jan hom n beetje oet stuur aan en zee op n duur jaaah dat is ook zo, aal heb ik mien bedenking der over of e t wel zeker wis.
Ze waren van de Rotary club van Oskert en as je doar lid van binnen din worden t sums haile aander mensen.
Benoam as bórgmeester ook ien zoal zit, stoeven ze der as bók op hoaverkist op óf.
t Ainege historie dat ik wait van Jackob Jansen waas dat e vrouger radio’s verkocht.
Ook op feesten herken je ze geliek lallend en zo doen as kut waiten ze zich nait te gedroagen , op oetzunderingen noa vanzulf.
Jobke Nainhoes was ook lid en haar n fietstocht veur de hotemetoten oet zet en kregen onderwegens kóvvie en n dreug koekje ien ons dórpshoes.
Ook Jobke mos even mit bórgmeester proaten en din kin je zo haard roupen en réren as je willen, mor as Marijke ien t zicht is zain ze gain aander.
De veurzitter van dórpsbelangen Groaf Goos Gosling Slotegraaf, groaf van Zandeweer en Eppenhoezen tot Doodstil aan tou opende de oavend.
Hai opende de oavend nait allain hai kreeg hom verdorie nait weer dicht, dij lult eerliekswoar n snouk oet t woater.
Zulfs de man dij altied maint dat e wat zeggen mout zat mit mond open te kieken.
Goos mos t boukje overhandigen aan Marijke v Beek, overhandigen docht ik ook ja,hai, hai, hai las t haile bouk zowat veur.
Mor, Marijke kreeg heur boukje en deur de joaren hén kreeg ik n zwak veur Marijke.
Gain muitte is heur teveul, ze is altied en overaal, woar mor ook.
Mit de oardbevingsprotesten ien stad is ze altied present soamen mit aandere bórgmeesters lopt ze mit veurop,voak mit n groot spandouk.
En dat lu is mooi, oneerbiedig is Marijke t keffertje van de bórgmeesters.
Komt ook deur heur stem, dij schut nog wel ais oet mor ze maint elk woord wat ze zegt.
En din dat spandouk dat omhoog hollen word deur de langere bórgervoaders,
Marijke lopt din ien t midden en trekt hom omdeel omdat ze aans niks zain kin.
Vrijdagoavend dee ze mie aan Hanneke Joagersmoa denken, de eerste communistische bórgmeester van Nederland.
Ook net as Marijke voak n rood jaske aan en n Swart rokje over heur onderdoanen.
En dou kwam Jan en Jan is Jan, doar is gain twijde van.
Jan waas vrouger aal biezunder, ik bin zien buurjong west dus ik kin t waiten.
Dat begon aal op legere schoul, draaiende ogen en spastische bewegingen waren de kenmaarken van ons Jan.
Jan zien voar, voarde op n groot schip over de wereldzeeén.
Zo kwam t ook dat Jan zodounde wat Spoans kon, benoam t tellen ien t Spoans.
Decembermoand, en Sunnerkloas kwam op schoul, t waas trouwens Ep Kriegsheld mit n gebelskop op.
Jan mos bie hom kommen en Sunnerkloas kwam oet Spanje vanzulm.
En dou zat t der aal ien, Ol boas vroug Jan te tellen tot tien ien t Spoans.
Jan begon te tellen tot vief en dou zee Jan ienains tegen Sunnerkloas: en nou doe verder.
Hai kon ook duuvels mooi striptaiken wait ik nog wel, mien neef dij bie ons opgruid is haar n hechte band mit Jan en as neef ain moal ien vatten doagen thoeskwam zat Jan zundagsmórns bie ons ien koamer om zien waark zain te loaten.
Ook zat e din achter ons gruin bankstel te poppenkast te speulen en dou kon e ook aal zo vreselek krijsen.
Mor Jan het t red, is goud terecht kommen , het K ter Loanpries wonnen moakt toneelstukken, theoaterproducties en zingt alles wat mooi en verrót is bienkaander.
En nou ien t Theoater t Klokhoes ien Zandeweer reerde Jan net as vrouger bie ons achter baank over mislopen laifdes en wat wel nait.
Mooi verske over begravvenis van zien Moeke en over Jampie dij ze vonden ien t Botterdaip en ik en nog wat meer wizzen welke Jampie bedould wer.
Marijke keek bedenkelek dou Jan zien verskes deur t Klokhoes neukten.
Heur man lachte voloet, hai is ook ja gain bórgmeester, nschiere kerel komt oet Alkmaar zee e.
Jan zien leste vers waas net as t eerste ” Doen ien Oskert”
n Pracht oavend heb wie had Zandeweer Eppenhoezen en Doodstil.
Dórpsbelangen is lós soamen gain stip, mor straks belangriek ien gemainte Hogelaand
Soamen staark zunder ófgunst of wat din ook zellen wie ons heuren en zain loaten
Marijke en heur gevolg gingen blied noar hoes, wie zitten nog even noa mit n plougje en doun zoas gewoonlek weer t licht oet.
Ien gedachten zai ik n koppeltje fietsers noar hoes fietsen Jackob Jansen en Jaap Nainhoes veurop onder de leste klanken van ……………”Doen ien Oskert”
Stronk
