Column I-Pit en Stronk

Foto: HogelandNieuws

BENNEN ZE NOU HAILEMOAL BELEDDERD?!

Stronk aan lien.
‘Hezze al rieden zain?’
-Wel?
‘Dij knuppels van HogelandNijs’
-Winzem.nijs zels bedoulen
‘Ja, nou nog, mor ze bennen al aan t veursorteern’
-Hè?
‘Winzem.nijs en Marne.nijs worden Hogeland.nijs, as nije gemainte iengaait’
-En?
‘ Jonges van Winzem.nijs zaag ik al rondrieden ien heur autookes,
Cees, Törrengoa, tröts asn hond mit zeuven steerten’
-Mit HogelandNijs derop?
‘Joa’
-Wat n sjoopikken!De grode boazen goan dikdoun?
‘Dikdoun? As ik Cees nou rieden zai, dij paast r mor zuuneg ien, dij haar toch beter
n trapauto hemmen kent, en dat zol veur Ard ook nait verkeerd wezen,as ze nou oetstappen hebben ze auto aan kont hangen’
-Doar zegs zowat. Mor t zol mie nait verboazen, as de heren kommende tied
nog even flink oetpakken, straks n dikke Mercedes of wel wait Porsche onder kont, mit n dikke rekloamezoel der boven op…
‘En n geluudboks der op mit n sirene, den kennen ze nog eerder bie n ongeluk wezen as plietsie of ambulaans….’
-En den t volk achter HogelandNijs aan, zoas wie vrouger achter brandweer aangingen
‘As ze mor nait te veul verbeeldens kriegen, ik zai Cees der wel veur aan, hoofddirecteur van HogelandNijs, overaal dikdakken mit hooggeploatste personen (zet mor op reken) en evenementen zulf organiseern (dus nog veul meer as nou t nijs zulf moaken)…’
-Opnduur gaait dat net as ien t olle Romeinse Riek, ze gonnen oeteindlek aan de weelde ten onder; dou Caesar, straks Cees mit n trös droeven ien houk van bek en Ard mit Cleopatra ien bad mit Romeinse bokkemelk
‘Ja, en den bedenken dat börgmeester Marijke van Beek aargens ien t oosten van t laand heur dochter traauwde en mit heur man ien n ol kèrreven overnachtte, ze haar dunnerhoud der bie op omreden sleurhut lekte as n theems’
-Ik geloof dat ze ons as kolumnisten bie HogelandNijs feilek gain scheet ien reken hemmen, ze zain ons zo’n beetje as folkloristische puntjezoegers, dij ze aan t end van t joar mit n kolle kroket en n dreuge worst zuit hollen kennen
‘Hes geliek, t is laifdewaark old pepier’
-Nou wat doun we Stronk, stoaken?
‘Goud idee I-pit, gain mens dij t vernemt’
-Ofsproken, veurlopeg gain kollems
‘Ien orde, moi’

 

I-Pit en Stronk

Reacties