Nummer Aacht
k Staai bie benzinepomp ien Hoorn Whij te tanken , ienains heur ik …hè Stronk !
Mien gedachten goan terug noar vrouger Poulstroatje nummer aacht.
Der woonde n groot gezin, Pa waas mindervalied zoals dat haitte ,laip op krukken en ree ien n drijradder.
Moeke waas n fel apperoat hoar op koezen, gek op koarten en weddenschoppen.
Der gait n verhoal rond dat ze ais honderd gulden wonnen het van n kerel dij n gloazen oog haar.
Ik kin wat, wat joe nait kinnen zee dij man , en hil t oog der oet , woarop Moeke t zulfde dee, omreden zai zulf ook n oog van glaas haar.
t Waas altied gezelleg ien Poulstroatje, de Jordaan van t dórp.
Zummers ol Joap op stang joagen,n koekje bie tan Wilmtje hoalen, speulen ien n dreuge sloot woar jongens en t wichtje van n twijling ien megen ,as nood weer ais te hoog waas.
s Winters snijbrug baauwen woarover wie mit slee overhén vlogen om der
s oavends woater overhén te gaiten veur de volgende dag.
Mainste kiender haren altied wel wat meroakels, , mor de kiender van nummer aacht, doar zat gain gebruuksaanwiezing bie.
Ain van oldsten haar s winters altied de gewoonte om mit n snoukdoek ien snij te springen dat ien n dreuge sloot valen waas , allain bainen stoken der din nog boven oet , wie mozzen hom der weer oettrekken , omdat hai aans wel ais stikken kon.
Aander jong waas van mien leeftied , en haar arms n centimeter laanger as mienend, wie vochten wat of , en aal waas hai n n joar older as ik , ik kon hom wel hebben.
Ik zat din boven op hom en hai graaide din noar mien kop en kraabte mie.
k Zee din : Liekst wel n wief en din wer e nog kwoaier en deur zien kraaben kreeg ik aalmoal drijhoukjes op mien kop omreden hai zien noagels ook nooit knipte.
Ze waren doar aacht jongen thoes , mor respect veur Pa waas der deur en deur.
Ol man legde ellebogen op zien krukken , floot op vingers en jongen waren net rótten oet ale houken en goaten kwam der wel ain.
Wel din t eerst bie etentoavel waas kreeg din ook t mainste, dat oarde heur haile leven deur , as der n etentje ien dórp is , is der altied nog ain van dat gezin dij denkt dat e te min krigt.
Der waas ook n twijling n jong en n wicht , t wicht heb ik aal nuimt , dij meeg gewoon mit ons mit ien dreuge sloot en jong dij waas nou ja ADHD beston nog nait mor wif waas e wel.
Wie haren mit keuniginnedag altied spultjes en zai mozzen din verplicht winnen aans kregen ze zundoags gain eten op bord.
As ze nait wonnen din waas der vaals speult volgens heur, noatied kwam der voak n goocheloar om kiender te vermoaken.
t Jonkie van twijling zat din veuraan en dij ol droktemoaker kreeg veurnkaander dat goocheloar ontgoocheld weer noar hoes ging.
As e n truuk veurdee wist t jongkje aal laank veurtied hou t ienkaander stak, mouk dat din ook duudelk kenboar , kerel wer der sténflaauw van en wie waren slap van t lachen vanzulf.
Loater dou kereltje wat older wer begon e wat op Robin Gibb van Bee Gees te lieken , tandjes wat noar veuren en onneuzel kieken.
Hai ging ook voetballen , der is n moal gebeurd dat zien Moeke mit handtas t veld opkwam omdat t jonkje onderoet schopt wer..
t Waas ook zo as e n tikje kreeg begon e te janken of der n swien slacht wer.
Je mozzen je voak doodschoamen as je der mit op pad gingen.
Zien bruier waas aans, voetbalde ook , mor waas keihaard, dat kwam omdat ik hom voak omstreken haar,en doar waas e nait minder van worden.
Mor ze konden nait tegen heur verlais, dou ik doudestieds zo nou en din ais mit t eerste elftal mitdoun mog, kwam dat omdat mien olheer ien t bestuur zat en jeugdleider waas, zeden ze
Bin n joar loater bie koksioanen op Mei goan voetballen omdat t gesoes daarover
sténzat waas.
Mor je kinnen zeggen wat je willlen, ze binnen aalmoal goud op stee kommen.
Ain waarkte bie boer aander wer sjefeur weer n aander bie prevenzie, weer n aander bie n baauwbedrief, nee doar waas niks op aan te maarken.
Poulstroatje nummer aacht , n waarm hoeske woar t altied noar slóffe meelkoekjes rook.
Tank is vol, hé Stronk heur ik , ik kiek op en zai t gezicht van Robin Gibb.
k Zeg blied hou ist, en wat dust tegenwoordeg?
Bin pompbedainde west ien Winzem en rie nou op n keesbus rond zee e.
k Rie vót en zai hom aal klainer worden ien spaigel,en noarmoate hai klainer wordt begunt e aal meer te lieken op t lutje jongkje van vrouger……niks verandert.
